عيد سعيد وسنة جديدة سعيدة ..ان شاء الله

كل سنة وكل الاصدقاء بخير...تحياتي

اسامة

صور من ساحل الادرياتيكي

هذه صور من بلدة بلاتسة على ساحل دلماشيا

تطل على البحر الادرياتيكي

الاهداء لدكتور خالد ودكتور وليد

ودكتور ياسر وشريف وابو الليل

والدعوة عامة بجد

قصيدة من ديوان " الاعمى يغني لمدينته" لعبد الله سيدران

الشاعر والكاتب والسيناريست البوسني الكبير عبد الله سيدران غير معروف كثيرا لقراء العربية


اتمنى ان تعجبكم قصيدته


القبر و النفق

في الغد تنصرم ثلاثون عام على وفاة والدي

في هذا الوقت كان كل مرض مميت يسمى سرطانا

لكن كان من الممكن وبكل بساطة ان نكتب على شاهد قبره

تحت النجمة الخماسية

قتله لسانه

الحمد لله العليّ العظيم فماتزال امي بعافيتها وهي في عامها الخامس والسبعين

وموتها ودفنها.. ليس

عليّ تحملهما
ليلة امس وبمساعدة بعض الرجال الطيبين
نجحت في وضعها في النفق

سراييفو 2فبراير 1995
ترجمة اسامة القفاش عن البوسنية والانجليزية

الصور هي جسر موستار العتيق

سيدران

بوستر فيلم ابي في رحلة عمل لامير كوستاريتسا والذي كتب له سيدران السيناريو

ياناس في ناس بتقرا وتفتكر...بلاش الطريقة دي

تحت عنوان

الاسكواش المصري يعتلي قمة الرياضة والاتحاد يستعد لتكريم أصحاب الانجاز

كتبت جريدة الاهرام موضوعا عن فوز عمرو شبانة الذي تكلمنا عنه بالامس .ثم بعد

اشياء كثيرة منها خطأ نحوي

تألقن لاعبات المنتخب

والصواب تألقت

كتبت الصحيفة بالحرف لتعود البعثة المصرية من نيوزيلندا وهي تحمل لقب بطولتي الفردي والفرق في سابقة تعد الأولي من نوعها في تاريخ الاسكواش المصري والعالمي‏ للاسف هذا الكلام غير صحيح على الاطلاق.

وينكر حقيقة موثقة لم يمر عليها اكثر من 12 عام فقط ومازال ابطالها احياء يرزقون ومنهم البطل المصري احمد برادة بطل العالم للناشئين عام 1994 في نيوزيلندة برضه
فقد فاز الفريق المصري للناشئين في هذه البطولة باللقب وكان احمد برادة قد فاز بالبطولة الفردية بعد فوزه على عمر البرلسي(المصري برضه والذي عاد هذا العام من الاعتزال )في النهائي وكان معهم ايضا احمد فيظي الذي فاز بعد سنتين بلقب البطولة الفردية...طب ليه الكلام ده وكل شيء موثق وموجود على الانترنت و في الموقع الذي ترجم عنه الخبر؟؟؟
اقول لحضراتكم ليه ؟؟
عشان الاساس عدم الدقة و السبهللة وكله عند العرب صابون..... وهو في حد بيقرا يا عم .....و المدونين هم البهائيين وانت محموق قوي كده ليه؟؟ ده الموضوع مجاملة...هو فيه حد بيقرا؟؟؟ وبصراحة شيء مقزز وبشدة وايوه فيه ناس بتقرا و بتفتكر. شوية جد بقى

الصور من ارشيف مؤسسة الاهرام!!!واخدين بالكم الاهرام..اللي نشرت الخبر
صورة المدونة نورا يونس من مدونة الاستاذ مختار العزيزي...وآسف يا استاذ مختار على استعارة الصورة بدون استئذان.
وكانت جريدة المصري اليوم قد نشرت صورة مشابهة واصفة الاستاذة نورا بانها بهائية!!!لامبالاة غير معقولة
وهم يضحك وهم يبكي
وجدت الصورة في المصري اليوم عند شريف عبد العزيز.شكرا يا شريف

مبروك لعمرو شبانة

فاز عمرو شبانة بطل العالم مرتين للاسكواش و المصنف الاول على العالم ببطولة السعودية الدولية المفتوحة الثانية للاسكواش في الخبر في المنطقة الشرقية .وهي ثاني اكبر بطولات الاسكواش في العالم من حيث الاهمية والقيمة المالية للجوائز.البطولة تحت رعاية مجموعة شركات التركي السعودية وبرعاية الاستاذ زياد التركي ابن صاحب المجموعة
جاء هذا بعد فوز عمرو على الفرنسي جريجوري جولتييه 3صفر بنتيجة اشواط 11/7 و 11/9 و11/4
قد يبدو الموضوع مجرد خبرا رياضيا لكنه في تقديري خبرا شديد الاهمية ...
انه الدليل الساطع على ان المنطقة العربية تتغير برجاء لمن لا يصدق ان يقرء بعناية تغطية البطولة في موقع

http://www.squashsite.co.uk

و يتأمل الصور...
وتعليقات المعلقة الفرنسية فرامبواز جوموندي او ضفدع الاسكواش
يا جماعة بصراحة في تصوري ده فعل بنائي هام جدا

اجاسي....اعتزل

تسمحوا لي ان اعترف انا بحب التنس جدا من صغري. وكنت اهوى متابعة بطولة مصر الدولية و ايضا الاسكندرية الدولية في الستينات في نادي سبورتنج.وكنت احفظ اسماء لاعبي الستينات والسبعينات و الثمانينات...ناستازي الروماني ...بيليتش اليوغوسلافي... لندكفست السويدي...سانتانا الاسباني... رود ليفر الاسترالي ..آش الامريكي...ستان سميث ...روزويل الخ وطبعا بورج(على فكرة هو بيتنطق بورة بالسويدي ومكنتش بحبه)وفيلول التشيلي و الارجنتيني فياس....ياه لعيبة كبار قوي .
منساش من الستينات طبعا متريفيللي السوفيتي وطبعا اسماعيل الشافعي المصري وبعده علي الداوودي و احمد المهيلمي...وغيرهم طبعا
المهم انا قلت القدام لكن منساش طبعا ليندل و ماكنرو وكونورز وبوم بوم(ولو اني مكنتش بحبه)ثم ظهر الجيل الامريكي المتميز الذي سيطر على اللعبة في التسعينات
سامبراس..كوريير..تشانج..و طبعا ظهر لعيبة كبار من اسبانيا وموستر النمساوي و كيرتن البرازيلي ومتعدش......
لعيب واحد اللي مقدرش انساه وكتبت عنه قبل كده (في جريدة القاهرة)وانا في رأيي الشخصي المتواضع انه اعظم لاعب في تاريخ لعبة التنس(حتى فيدرر الاسطورة الجديدة في رأيي ولو ان كلامي لا يؤخذ عليه كثيرا في هذا الصدد لاني متعصب جدا و ايضا لاني مفهمش قوي )اللعيب ده هو اندريه اجاسي.شفته اول مرة بيلعب في نهائي الرولان جاروس ضد الاكوادوري اندرياس جوميث
وكنت بشجع الاكوادوري (ثورية بس )لكن الواد الامريكاني الخنفس(وقتها مكنش حلق اصلع)كان لعيب قوي
صحيح ان جوميث كسب ( وانا انبسطت...خيابة بقى تقولوا ايه؟؟؟)الا اني فعلا انبهرت بلعب اجاسي
ومن يومها و انا متابعه...في كل احواله ..وهو بلاي بوي واتجوز بروك شيلدز و هو عاقل و يستعيد مكانته العالمية ويحقق اعظم انتصاراته ويرجع نمرة واحد على العالم(1999) و يكسب 2 جراند سلام ويوصل للنهائي في التالت في سنة واحدة و ينهي السنة كنمرة واحد ويكسر احتكار سامبراس للموضوع ده.وكل ده بعد ما كان وصل ترتيبه الى 147 على العالم ...اندريه اجاسي قصة كفاح مذهلة ونجاح جميلة
والبوست ده تحية مني الى اعظم لاعب ودع الملاعب بعد 20 سنة تنس
الى
اندريه اجاسي


الاهداء الى الصديق الجميل

وليد عبدالله و ابني يحيي اسامة

صور من زغرب

هذه الصور من زغرب....
الصورة الاولى
لميدان زغرب الرئيسي واسمه ترج بان يوسيب يليتشيتش هو حاجة كده زي ميدان المنشية في الاسكندريةاو ميدان العتبة في القاهرة عشان فيه تمثال راجل راكب حصان وقهاوي و محلات و كمان ترام ودي وسيلة المواصلات الاولى والاساسية في زغرب...على فكرة التذكرة سعرها 6ونص كونا يعني حوالي ستة جنيه ونص يا بلاش...متتخضوش
الصورة التانية
للمركز الاسلامي او الجاميات زي مابيسموه هنا . حاجة جميلة جدا. فيه مطعم ومكتبة وقاعات تدريب موسيقية و قاعات اجتماعات و فيه فرقة كورال اسمها ارابيسكا ...ممكن تشوفها هنا
الصورة التالتة
لبحيرة يارون الصناعية التي اسكن على مقربة منها .البحيرة اتعملت بمناسبة دورة الالعاب الاوليمبية الجامعية(اليونفرسياد) التي اقيمت في زغرب في الثمانينات .وماتزال تستخدم لالعاب الماء وخاصة التجديف
ودول فريق الانقاذ.يا حلاوة
الصورة الرابعة
ده طبعا عمنا فنسنت فان جوخ.واحد يقول طب ايه علاقته بزغرب؟؟على فكرة انا ممكن جدا ارد واقول مدونتي وانا حر فيها...لكن الحقيقة هي كانت موجودة في متحف ميمارا او المتحف القومي الكرواتي في زغرب بمناسبة معرض جميل جدا افتتح في الربيع الماضي وكان اسمه هولندا بها اشياء اخرى ايضا غير الهيج!!طب يعني ايه؟؟؟
الهيج هنا رمز للمحكمة الدولية لمحاكمة جرائم الحرب في البلقان والتي يحاكم فيها متهمين من صربيا(اساسا و اشهرهم طبعا السيد ميلوشيفيتش )و من كرواتيا بنسبة اقل (واشهر المتهمين الكروات هو الجنرال انتة جوتوفينا الذي القي القبض عليه مؤخرا في اسبانيا بعد ان كان هاربا ووجد في حوزته عشرات الالوف من اليوروهات والدولارات والعملات الاخرى ناهيك عن كروت الائتمان... فتدبر يا مؤمن!!)و اخيرا من البوسنة
المعرض كان محاولة لتذكير الكروات ان هولندا قدمت فن وثقافة وان اختيارها كمكان للمحاكمة لم يأت نتيجة المؤامرة الدولية (ده ولية اللي يقول غير كده طبعا في عرف اصدقائنا من اصحاب نظريات المؤامرة المستمرة)و طبعا كل ده عشان عيون الاتحاد الاوروبي


البوست ده اهداء الى ابو الليل و شريف نجيب اللذان طالباني برفع صور لكرواتيا وخاصة دلماشيا و الساحل الادرياتيكي
وده حيحصل ان شاء الله

قصتين!!الى ابي فارس

الاخ العزيز الدكتور خالد التدوينة الاخيرة في ميا مسا اثارت شجونا كثيرة وذكرتني بقصتين
ولذا ها انذا اكتبهما.القصة الاولى حكاها لي الصديق صلاح عيسى او حضارة كما يسميه اهل قريته كفر ميت الحارون .الانسان المثقف الدمث
والقصة الثانية اذكر اني قرأتها ولا ادري اين و لكن في سياق مختلف تماما وستدرك الفرق
الى الصديق ابو فارس والصديق وليد عبد الله


القصة الاولى
قابل سيدنا موسى العبد الصالح او سيدنا الخضر فسأله عن الاولياء .فقال هذا ان الاولياء صنفين

ولما استفسر موسى عن هذا ..قال له سأريك
وذهب معه الى دكان علاف وكان الرجل جالسا يذكر الله في صمت ويسبح.قال له الخضر في خشونة عايز كيلة قمح اتحرك!!!
قام الرجل و احضر كيلة القمح.. وما كاد يجلس الا والخضر ينهره قائلا انت حتقعد قوم هات لي كيلة فول..اتحرك!!!
قام الرجل واحضر كيلة الفول..اخذ الخضر الكيلتين و وضعهما على بعض وخلطهما بيده ثم قال للرجل ايه القرف ده مش عايز حاجة منك.نظر اليه الرجل في تسامح وقال :كتر خيرك انا كنت قاعد بسبح وخايف حاجة تشغلني...دلوقتي حاقعد اركز في التسبيح وانا بفصل الفول عن القمح...كتر خيرك
سحب الخضر موسى من يده وقال له هذا ولي لا يعرف انه ولي
ثم اخذه الى دكان علاف آخر .كان الرجل يبيع ويشتري و يكلم الزبائن وعندما اقترب منه الخضر وموسى
قال الرجل:معنديش
قال الخضر: معندكش ايه؟؟
قال الرجل:معنديش اللي انت عايزه...
و قبل ان يتكلم الخضر تابع الرجل:بص انت الخضر وده موسى واتكلوا شوفوا مصالحكم متعطلونيش.
وسحب
الخضر موسى من يده ضاحكا واختفيا .ثم قال الخضر :ده ولي عارف انه ولي.
القصة الثانية
يقال ان عالما من علماء الحملة الفرنسية اراد ان يبهر شيوخ الازهر فعرض عليهم تجربة الضفدعة و الكهرباء الشهيرة لجلفاني
وعندما انتهى سأله احدهم:هل يجوز في علمكم ان يتواجد المرء في مكانين في وقت واحد؟؟؟
وعندما ضحك الفرنسي قائلا :بالطبع لا يجوز...كان رد الازهري :عندنا يجوز وترك الفرنسي حائرا وانصرف....والله اعلم


البورتريه للفنان المصري الجميل الصديق العزيز
عمر الفيومي

فيه حاجة غلط!! ده مش المسلسل بتاع الله يرحمه حسن عابدين

قرأت وسمعت عن وحاصرتني قضية حق البهائيين المصريين في كتابة ديانتهم في خانة الدين في البطاقة الشخصية وشهادة الميلاد وكنت اعتقد من كثرة ما قرأت وسمعت (وطبعا انا غلطان اني مرحتش لمدونة الراجل مباشرة وقريت الموضوع بحق وحقيقي)ان الموضوع له ابعاد سياسية و قضية دولية وحقوق انسان الخ....الى ان قرأت تعليق من حسام في مدونة ابو الليل على الموضوع...
وفوجئت بفداحة الكارثة 3 طفلات في عمر الزهور اخذت اوراق شخصية من ملفاتهن الدراسية في مدرستهن وهن مهددات بالفصل...كيف حدث هذا؟؟؟ كيف سمحت ادارة المدرسة بهذا؟؟؟ بصراحة مش عارف...اقول ايه ....حسبي الله ونعم الوكيل ولا حول ولا قوة الا بالله العليّ العظيم



الصورة من اعمال سيندي تشين

الفارس والعجوز

فيه قصة من القصص الشعبي بتتحكى :

عن ان سيدنا موسى طلب من ربنا انه يوريه عدله

وكان على جبل

قام ربنا قال له بص للي حيحصل تحت الشجرة اللي عند سفح الجبل

موسى بص

لقى فارس راكب حصان بيربط الحصان في الشجرة وينام

كان فيه كيس فلوس في السرج

جاه فلاح شاف الكيس مد ايده وخده واتكل

جه راجل عجوز مهكع من الناحية التانية

شاف الشجرة نام تحتها

صحى الفارس ملقاش الفلوس بيدور لقى العجوز

قال له سرقتني

العجوز قال له سرقت مين يابني

الفارس ضربه موته

موسى انخلع قلبه قال لربنا ده عدلك يا رب؟؟

ربنا رد عليه وقال له

هو ده عين العدل الفارس اخد الكيس م الفلاح ظلما وعدوانا والفلاح استرده

والعجوز ده كان جبار في شبابه وقتل ابو الفارس غدرا وغيلة

والفارس خد بتاره..

الحدوتة دي ممكن تشوفها على انها كفر وفسق والعياذ بالله

وممكن تشوف انها حاجة تانية

عن المدونة الجديدة

لقيت الكل بيحول للبيتا وانا لوحدي في البلوجر اولت مابدهاش حول يا ولد. اصل انا معنديش شخصية. إمعة يعني.وعشان كده البلوج ده حيبقى بلا شخصية ....بس دي مش الحقيقة ...الحقيقة المرة ان انا مش عارف اعلق لا عند ياسر ولا عند وليد ولا عند خالد ولا عند ايماتيور مع حفظ الالقاب طبعا من دكترة وهندزة... فقلت مابدهاش اعمل بلوج ويكون بيتا واهه نشوف ونحط فيه شوية الحاجات الممكنة ...الاخبارية او غير الفكرية او الفنية وربنا يسهل