عن نقابة السنيمائيين والعمل النقابي...اهداء لعمرو صديق شريف نجيب

كلمني شريف نجيب (واحد يقول تاني
شريف ...الظاهر مش حنخلص منه)بس الحقيقة المرة دي كان في موضوع مهم استوقفني .قال لي ان صاحبه عمرو سلامة كان في حوار مع ممدوح الليثي نقيب السنيمائيين في قناة تلفزيونية وان الليثي طالب 150الف جنيه لاعطاء ترخيص لعمرو للسماح له بالاخراج السنيمائي ومبرره انه لازم يحمي المهنة وان الاخراج علم و ان ممكن الواحد يمارس الطب من غير إذن نقابة الاطباء؟؟؟.


و الحقيقة الكلام ده يجرنا لتلت مواضيع
الموضوع الاول معنى النقابة
الموضوع التاني فكرة العلم
الموضوع التالت هل يمكن ممارسة مهنة الطب في مصر بدون إذن نقابة الاطباء؟
ولأن الموضوع التالت اسهل حاجة عشان سؤال فانا حجاوب عليه بوصفي طبيب وخريج طب الاسكندرية عام 1981
والاجابة هي آه
ما يجعلني امارس مهنة الطب ويعطيني هذا الحق هو تحديدا ترخيص ممارسة المهنة الذي احصل عليه تحديدا من وزارة الصحة
يعني من الدولة التي من حقها تنظيم ممارسة المهنة بقوانين وهذا مايحدث
يعني مش من حق النقابة لانها مش الدولة وهنا نأتي للموضوع الاول
معنى النقابة؟؟؟
النقابة تجمع اختياري تطوعي و خدوا بال حضراتكم قوي من اختياري ومن تطوعي للعاملين في مهنة واحدة يعني مهني
وبالتالي بنلاقي مثلا نقابات متعددة للاطباء في امريكا
على فكرة برضه في امريكا البورد مش السنديكات او السوسايتي
وفي قصص كتير قوي على معارك قانونية لمنع السوسايتيز من اعطاء تراخيص
ومش موضوعنا
الفكرة في النهاية انه في اي حتة في الدنيا بتدعي الديمقراطية والحرية
عضوية النقابة عملية اختيارية والناس بتنضم اليها لمزاياها مش لانها سبيل العمل
وعلى فكرة ده كان اللي حاصل زمان في مصر قبل تأميم النقابات في عهد يوليو
يعني ببساطة الكلام عن ان من حق النقابة منع اي فرد من العمل
هو كلام فارغ و لامحل له من الاعراب في اي دولة ديمقراطية النقابات فيها تنظيمات مهنية اختيارية اهلية غير تابعة للدولة
نرجع بقى للسؤال التاني او الموضع التاني
العلم؟؟؟
العلم تعريفه وفقا للكثيرمن المعاجم يعني الملاحظة و التعريف والوصف والتجربةو القابلية للخطأ
و مسالة ان الاخراج علم معلش يا استاذ ممدوح فيها قولان لان قابلية الخطأ غير موجودة هنا
اي حاجة صواب ليه لان الخطأ غير الجمال و الوحاشة والمقبول عند الناس
الموجود في اي مؤسسة تعلم الاخراج في الدنيا هو حرفيات يعني شوية آليات لتيسير الامور على من يرغب في ممارسة هذا الموضوع


يا ترى كلامي واضح؟؟؟

شريف نجيب ...سنيمائي متميز

عندما اتصلت بشريف نجيب يوم الخميس 4 يناير وانا اتأهب لمغادرة مكتبي ،لم اكن اتوقع ان يسألني ومين مستنيك في المطار يا دكتور؟؟ كنت ساصل فجر الجمعة 5 يناير و لذا قلت له لا احد قال جميل انا حأجي استنى حضرتك قلت له مفيش داعي يا شريف حوصل الساعة 4 الفجر لكنه اصر وقال متنعاش هم يا دكتور ده وقت مناسب جدا..وعندما خرجت من المطار وجدت امامي شاب يرتدي نظارات وشعره منكوش و يستقبلني بالاحضان وكان اجمل استقبال ممكن ان يحظى به الانسان عندما يصل الي القاهرة القاهرة ليلا لمن لا يعرفها رائعة شوارع فاضية و هادية و الاماكن المفتوحة كتير قلت له عايز آكل طعمية ياشريف رحنا اكلت طعمية وهو ما اكلش ادعى انه بيعمل دايت
يمكن لان الاكل كان طعمية!!!
وبعدين قعدنا على قهوة وشربنا شاي و شيشة واتكلمنا في كل حاجة السنيما والجرافيكس والتدوين والاصدقاء تركني شريف الساعة السادسة ورغم انها كانت اول مرة التقيه فيها الا انني كنت احس انني اتكلم مع صديق قديم و دائم ان شاء الله
شريف نجيب سنيمائي متميز و صديق عزيز تحياتي ياشريف
مش عارف اكتب اكتر من كده...بس يا ريت الناس اللي تقرا يوصلها احساسي بجد
والاهم يفتحوا اللينكات
شريف مرضاش يبعت صورة بس برضه كتبت
الصورة دي شريف فيها مش شريف اللي شفته
على فكرة هو اتغير بعد ماراح كندا ودرس جرافيكس
و الافيش طبعا لاشهر اعماله
رجال لا تعرف المستحيل
وطبعا هو اللي عمل الحيل والمونتاج